आम्ही सर्व तालीबानी Talibani Similarities

 जगभरात सर्व धर्मात तालीबानी आहेत.

धर्माचा जयजयकार करणारा एक नेता असतो आणि तो सर्वांना प्रशिक्षण देत असतो. मोहम्मद ओमर ने पश्तून प्रांतात याची सुरुवात केली. ज्यांना तालिबान म्हणतात.

मुल्ला मोहम्मद ओमरला आपला देश ९९% मुसलमानांचा असुनही समाजवादी रशियन शासन आहे याचा प्रचंड राग आणि द्वेष मनात ठेवून ५० विद्यार्थी तरूणांना घेऊन तरूण संघ स्थापन केला आणि तालीबान फोफावला. 

अमेरिकेने याला बाहेरून भरपूर मदत केली. शस्त्रे पुरवली. 

तरूणांना हिंसा आणि युद्ध याचे महत्त्व पटवून दिले. तालीबानी प्रचार.

शेजारी देशाबद्दल त्यांच्या मनात विषारी विखार ठासून भरला. तशी पुस्तकं वाटली गेली. अमेरिकेने अफाट पैसा ओतून मूलतत्त्ववाद्यांची निर्मिती केली.

आपण सर्व ईस्लामी एक होत नसल्याने आपल्या राष्ट्राची दुर्दशा झाली आहे असे ठसविले गेले. तालीबानी तत्त्वज्ञान. 

आपल्याच धर्मात वाढणार्या जातींचा-गटांचा द्वेष निर्माण केला. देवबंदी मुस्लीम हेच शासक बाकीचे वहाबी, जमाते ईस्लामी, इ. संपविण्यायोग्य असा प्रचार. तालीबानी सांस्कृतिक वर्चस्व. 

धर्माचे शिक्षण असे गोंडस नाव देऊन दहशतवादाची सुरवात होते...मदरसा असे त्याचे नाव. तालीबानी धर्मज्ञान.

स्वतःचा स्वतंत्र झेंडा ते फडकवतात आणि देशातल्या शासकीय झेंड्याला पायदळी तुडवतात. तालीबानी स्वाभिमान. 

जे धर्म मानत नाहीत किंवा धर्माप्रमाणे वागत नाही त्यांना मारून टाकणे किंवा बहिष्कृत करणे हे अशा तालिबान्यांकडून केले जाते. कुराण अंतिम. तालीबानी पुजारी. 

इथे शरिया प्रमाणे वागणे हे महत्त्वाचे.देशाचे सरकारचे कायदे किंवा संविधान यांना काडीचीही किंमत न देणे याला तालीबानी कृत्य म्हणतात.

धर्मात न बसणारे कला, नाट्य, सिनेमे, यातील कलाकारांना देहांत देणे यास तालिबान म्हणतात. 

स्त्रियांनी आधुनिक कपडे, जीन्स, इ. घालणे वगैरे गोष्टी म्हणजे धर्म बुडवेपणा आहे आणि म्हणून त्यांना मारून टाकणे हे तालिबानी कृत्य आहे. तसे तालीबानी प्रवचनकार स्त्रियांच्या मनावर ठसवत राहतात.

स्त्रियांनी पारंपारिक वेशात राहणे हे तालिबानी कृत्य होय. स्वसंस्कृतीचा उद्घोष. 

जर स्त्रिया धर्मातील अल्पसंख्य जातीतील असतील त्यांना कुत्र्यासारखे वागवणे, बलात्कार करणे म्हणजे तालिबानी कृत्य होय.

अन्य धर्मातील मंदिरे, मुर्त्या तोडणे फोडणे, हे तालीबानी कृत्य होय. १५०० वर्षे जुनी असलेली बामियाची बुद्ध मूर्ती. 

आमच्या संस्कृतीत घुसखोरी? करा उध्वस्त. 

धर्माने हिंसा केली तर त्याचे समर्थन करणे म्हणजे तालिबानी होय. याला पश्तूनवली म्हणतात. झुंडीने मारणे, जबरदस्ती करणे, इ.

देशाची सुरक्षा आणि शांतता हेच आमचे सर्वोच्च उद्दिष्ट आहे असे तालिबानी म्हणतात. मग सुरुवातीला विशिष्ट राष्ट्राचा धोका आहे असे म्हणत तालिबानी आणि मुजाहेदीन वाढले. हे राष्ट्र म्हणजे रशिया किंवा इराण होय. हेच हरकतई इन्किलाब इस्लामी. 

एक दोन राष्ट्रे शत्रू म्हणून घोषित करायची आणि स्वतः संरक्षक आहोत असे चित्र निर्माण करायचे. तालीबानी कुप्रचार.

धर्मामध्ये असलेले सर्व गट आणि तट हे एकाच राष्ट्रावर हक्क सांगतात तेव्हा तेथे अराजक माजते. मोहम्मद नजीबुल्लांच्या रशियाच्या पाठिंब्याच्या सरकारला पाडल्यावर तेथे तीन धर्मराष्ट्रवादी पार्ट्या एकमेकांना भिडल्या. हेझबी ईस्लामी गुलबुद्दीन, हिझबी वाहदत, इत्तिहादी ईस्लामी. धर्माचा राजकीय वापर करणारे घृणास्पद तालीबानी कृत्याच्या विविध धर्मसंघटना.

पोलीस,न्याय आणि शासन यंत्रणांचा बोजवारा उडणे म्हणजे तालीबानी.

बिगर सरकारी सामाजिक संस्थांना देशाबाहेर हाकलून लावणे किंवा बंद पाडणे म्हणजे तालीबानी. 

अहमद शाह मसूद हा तालीबान्यांविरूद्ध लढणारा एकमेव लोकशाहीवादी नेता होता. ज्याने स्त्री शिक्षण चालू केले. बुरखा बंद केला. सुधारणा घडवल्या. त्यांचा खून केला. हेच ते तालीबानी कृत्य. 

ज्यांनी तालीबान्यांविरूद्ध लढा दिला त्यांना कट कारस्थानाने, खुनाने संपवले. उदाहरणार्थ, बुर्हानुद्दीन रब्बानी, महम्मद दाऊद, अब्दुल रहमान सैदखली, इ.

जे जे विरोध करतील त्या सार्यांनी देश सोडावा किंवा मरावे म्हणत आपल्याच धर्मातील नागरिकांच्या गळा कापून १५ वेळा कत्तली एकावेळी शेकडोंच्या केल्या आहेत. तालीबानी फतवे.

जे आपल्या वंशाचे नाहीत त्यांना, सुमारे ६ हजार लोकांना,  क्रुर पणे संपविण्यात आले. उदाहरणार्थ मझार ई शरीफ.   तालीबानी वर्चस्ववाद. 

अल्पसंख्याक व खालच्या जातीच्या स्त्रियांवर बलात्कार आणि त्यांची विक्री हे तालीबानी कृत्य. 

आधुनिक व पुरोगामी विद्यार्थी, शिक्षक व प्राध्यापकांवर हल्ला करणे हे तालीबानी कृत्य. काबुल विद्यापीठातील उदाहरण.

आपल्याला मान्य नसलेला किंवा अडचणीचा इतिहास नाहीसा करणे म्हणजे तालीबानी कृत्य. उदाहरणार्थ पुली खुमरी ग्रंथालयाचा विनाश. 

जे अजान म्हणणार नाहीत त्यांच्यावर हल्ले. धर्म प्रेमाचे बेगडी तालीबानी  प्रदर्शन. 

कुराणावर पत्रकारांनी, लेखकांनी काहीही लिहण्यावर बंदी. आमच्या धर्मावर बोलायचे नाही. तालीबानी धर्म वीर.

आम्हाला पैंगबरांसारखे जग व वैभव  निर्माण करायचे आहे व त्यासाठी जिहाद आहे असे गाजर दाखविणे म्हणजे तालीबानी कृत्य. पुर्व संस्कृतीचा उदोउदो. 

हेच तालीबानी आता सत्ता काबीज करून सामाजिक शांतता, एकोपा, रोजी-रोटी, स्वतःच्या सत्तेसाठी उद्ध्वस्त करीत आहेत.

भीती हे हत्यार आणि भांडवल वापरून निरंकुश सत्ताप्राप्तीची अमानुष व्यवस्था म्हणजे तालीबान.

सुटाबुटातले, शिक्षित तालीबानी प्रचंड धोकादायक. 

शेवटी धर्मराष्ट्र ना!!!

तुमच्याही धर्मात तालीबानी आहेत. चालू द्यात...

- डाॅ.  प्रदीप पाटील

Pradeep Patil