माझे वर्तवलेले भविष्य!

 माझे भविष्यच फुटके निघाले.

ज्योतिषी ताकदीचा होता. पारंगत होता.

म्हणून जन्मतःच कुंडली केली.

मस्त अक्षरात ज्योतिष भास्कर उर्फ शिरोमणी जोशीबुवांनी लेखी भविष्य वर्तविले. 

पहिल्या वाक्यातच मी चितपट झालो.

जोशीबुवा म्हणतात...

" हा मनुष्य दानधर्म व जपोजापी करणारा असेल."

दुसर्या भविष्य वाक्यात मी सपाट झालो...

" ईश्वरी उपासनेत रस घेईल "

मी फारच वाईट्ट निघालो या बाबतीत. रस घेतलाय पण तो ईश्वरभंजनात. 

पुढे प्रकांड ज्योतिषी म्हणतात..

"नमोकार मंत्राचा जप केल्यास  आणि दानधर्म केल्यास याला विशेष चांगले फळ मिळेल. "

भारीच ना? मी चक्क सनातन बनलो. मंत्र-तंत्रांना उद्धस्त करत आलोय म्हणजे पाप काही फिटणार नाही. फळ-बिळ लै लांबची गोष्ट. 

" याला गुप्तधन मिळण्याची शक्यता आहे "

जोशीबुवांकडून हे गिफ्ट कुंडलीत मिळालं खरं पण आज अखेर घोर निराशा पदरात घेऊन गुप्तधन शोधत हिंडतोय. 

काही उपाय सुचतोय का माॅडर्न काॅम्प्युटरवाल्या ज्योतिषांना? कुंडली पाहून तेवढे गुप्तधन मिळवून द्या. फिफ्टी फिफ्टी करू या.

जोशीबुवांनी एकच भविष्य अचूक वर्तवलय..

" १३ ते १८ वर्षात कामासक्त होईल "

या जगात कुणी आहे का या वयात कामत्यागी असणारं?

असलाच तर डाॅक्टरी प्रॉब्लेम असणार राव !

एक सुचलंय. तुम्ही तुमचं लहापणीचं ज्योतिषाचं भविष्य शेअर करा. 

तसं ज्योतिषशास्त्र भंपक आहेच. पण मनोरंजन मुल्य अफाट आहे. 

करा मग शेअर. सगळे मिळून एंजाॅय करू या.

प्रारब्ध..ललाट...नियती..वगैरे वगैरे. 

- डाॅ.  प्रदीप पाटील